अमृतानुभव, अध्याय १ शिव शक्ति समावेशन, ओव्या १६ ते २०

विषो येकमेकांची जियें । जियें येकमेकांचीं विषयी इयें ।

जियें दोघीं सुखियें । जियें दोघें ॥१६॥

प्रकृती पुरूषा

होतसे विषय

पुरुषां विषय

प्रकृती ती ॥35॥

ऐसे परस्पर

देण्यात घेण्यात

जगती सुखात

दोघेजन ॥36॥

स्त्रीपुरूषनामभेदें । शिवपण येकलें नांदे ।

जग सकळ आधाधे । पणें जिहीं ॥१७॥

 स्त्री अन् पुरुष

दिसे नामभेदे

शिवतत्त्व नांदे

ऐकलेच .॥37॥

त्रलोक्य अवघे

व्यापले अधाधे

जे  काही भासते

दृष्टीस या ॥38॥

दो दांडीं येक श्रुति । दो फुलीं येक द्रुति ।

दोहो दिवीं दीप्ति । एकीच जेंवि ॥१८॥

दोन टिप-यांचा

एकच तो नाद

एकच तो गंध

दोन फुला ॥39॥

जरी लावियले

दिवे दो सामोरी

प्रभा घरीदारी

एक असे ॥40॥

 

दो ओंठीं येक गोठी । दो डोळां एकचि दिठी ।

तेविं दोघीं जिहीं सृष्टी । एकींच जेविं ॥१९॥

दोन जरी ओठ

एक असे गोष्ट

दोन्हीही  डोळ्यात

एक दृष्टी॥41 ॥

 

प्रकृती पुरुष

तैसे या जगात

ऐसे  नांदतात

एकपणी  ॥42 ॥

 

दाउनी दोनीपण । एक रसाचें आरोगण ।

करित आहे मेहुण । अनादि जें ॥२०॥

दावी दोनपण

परी रसपान

करी आरोगण

एकत्वाचे ॥43॥

प्रकृती पुरुष

अनादी  मेहूण

द्वैताचा दावून

आभास तो॥44॥