अमृतानुभव, अध्याय १, शिव शक्ति समावेशन ओव्या ३१ ते ३५

जेथें ऐक्याचा दुकाळा । तेथें बहुपणाचा सोहळा ।

जियें सदैवेंचिया लीळा । दाखविला ॥३१॥

एकलेपणाच्या
सारून दुष्काळा
अनंत सोहळा
मिरविला ॥65 ॥
सुदैवपणाच्या
दाऊनिया लीला
आणीले रूपाला
जगता या  ॥66 ॥

आंगाचिया आटणीया । कांत उवाया आणिया जिया ।

स्वसंकोचें प्रिया । रूढविली जेणें ॥३२॥

कष्टवून अंगा
शक्तीने शिवाला
बळाचा दिधला
आधार  की.॥67 ॥
मग त्या शिवाने
स्वयें संकोचून
प्रिये मोठेपण
जगी दिले ॥68 ॥

जियेंते पहावयाचिया लोभा । चढे द्रष्टृत्वाचिया क्षोभा ।

जियेतें देखत उभा । आंगचि सांडी ॥३३॥

 

तिला पाहण्याचा
लोभधरी मना
दृष्टत्वाची धारणा
धरे तोही॥69 ॥
असे अंगभूत
सदा ती तयात
म्हणूनी दिसत
नाही कधी॥70 ॥

कांतेचिया भिडा । आवरला होय जगायेवढा ।

आंगवला उघडा । जियेवीण ॥३४॥

कांतेच्या भिडे
पती जग होय
नटूनिया जाय
विविधसा॥71 ॥
परि तिये विन
अंगा हरवून
उपाधी हरून
नाही होय॥72 ॥

जो हा ठाववेर्‍ही मंदरूपें । उवायिलेपणें हारपे ।

तो जाला जियेचेनि पडपें । विश्वरूप ॥३५॥

नसता ते दृश्य
दृष्ठत्व विरत
जाई हरवत
पुन्हा शुन्यी ॥73 ॥

असा हा जो सूक्ष्म
विस्तारे हरपे
होय विश्व रुपे
जियेमुळे ॥74 ॥

***

अमृतानुभव © डॉ.विक्रांत प्रभाकर तिकोणे

https://kavitesathikavita.blogspot.com

https://amrutaanubhav.blogspot.com 

https://dnyaneshwariabhyas.blogspot.com/

https://dnyaneshawarichintan.blogspot.com/