प्रकरण आठवें ज्ञानखण्डन
सुरुवात
*******
अमृतानुभव, पद्य भावानुवाद, अध्याय ८वा ज्ञानखंडण ओव्या , १ते ५ (अभंग १ ते११ )
तैसें आमुचेनि नांवें । अज्ञानाचें ज्ञानही नव्हे । आम्हांलागीं गुरुदेवें । आम्हीच केलों ॥ ८-१ ॥
ऐसे गुरुदेवे
केले आम्हा ठायी
अज्ञानाचे नाही
ज्ञान तेही ॥१
आम्हीच आमच्या
स्वरूपी संपूर्ण
भान हरपून
दोघांचे ही ॥२
परी आम्हा आम्ही आहों । तें कैसें पाहो जावों । तंव काय कीजे ठावो । लजिजे ऐसा ॥ ८-२ ॥
आहे तरी काय
आपले स्वरूप
पाहण्यास आप
गेलो आम्ही ॥३
तरी पाहणे ते
गेले मावळून
जणूकी लाजून
ठायीची रे ॥४
हा ठावोवरी गुरुरायें । नांदविलों उवायें । जे आम्ही न समाये । आम्हांमाजीं ॥ ८-३ ॥
ऐसी कृपा केली
प्रभू गुरुदेवे
शब्दात वर्णावे
होईना ते ॥५
ऐसी या स्थितीत
ठेविले आम्हाला
पूर आनंदाला
आला जणू ॥६
आम्ही आमच्यात
नाही सामावत
फक्त आनंदात
आनंदतो॥७
अहो आत्मेपणीं न संटो । स्वसंविति न घसवटो । आंगीं लागलिया न फुटों । कैवल्यही ॥ ८-४ ॥
आम्हा न सहावे
आत्मत्व कल्पना
स्वरूप बोलांना
जागा नाही ॥८
आणि म्हणू जावे
यास मोक्षस्थिती
तर या शब्दाती
नुरू देती॥९
आमुची करवे गोठी । ते जालीचि नाहीं वाक्सृष्टी । आमुतें देखे दिठी । ते दिठीचि नव्हे ॥ ८-५ ॥
आमच्या स्थितीचे
करील जो गोष्टी
शब्दांची त्या सृष्टी
झाली नाही ॥१०
आणिक आमची
पाहिल जो स्थिती
नाहीच गा दृष्टी
जगी इया॥११
🌾🌾🌾 .
डॉ.विक्रांत प्रभाकर तिकोणे
https://amrutaanubhav.blogspot.com
🏵🏵
No comments:
Post a Comment