अमृतानुभव, पद्य भावानुवाद, अध्याय ९वा जीवन्मुक्तदशाकथन ओव्या ,११ते १५ (अभंग१९ ते २७ )

अमृतानुभव, पद्य भावानुवाद, अध्याय ९वा जीवन्मुक्तदशाकथन ओव्या ,११ते १५ (अभंग१९ ते २७   ) 

💮💮💮💮💮💮

परी आरिसा शिवे शिवे । तंव दिठीसी दिठी फावे । तैसे झाले धांवे । वृत्तीचे या ॥ ९-११ ॥ 

जशी काय दृष्टी 

शिवे आरशाला 

त्याच त्या क्षणाला 

फिरे मागे ॥१९

तयाची प्रमाणे 

इंद्रिय वृत्तींचा 

विषय भोगाचा 

व्यवहार॥२०

नाग मुदी कंकण । त्रिलिंगीं भेदली खूण । घेतां तरी सुवर्ण । घेईजे कीं ॥ ९-१२ ॥ 

नाग मुदी आणि

लेणे कंकणाचे 

वेगळे तयाचे 

लिंग रूप ॥२१

अन अलंकार 

जरी घेऊ जाता 

सोने  येते हाता 

प्रत्यक्षात ॥२२

वेंचूनि आणूं कल्लोळ । म्हणोन घापे करतळ । तेथें तरी निखळ । पाणीच फावे ॥ ९-१३ ॥ 

हाती घेता जावे 

पाण्याचे कल्लोळ 

हातात केवळ 

पाणी येते॥२३

हातापाशीं स्पर्शु । डोळ्यापाशीं रूपसु । जिव्हेपाशीं मिठांशु । कोण्ही एकू ॥ ९-१४ ॥

स्पर्शते हातास 

डोळ्याने रूपास 

जिभेने चवीस

काही कळे॥२४

 तर्ही परिमळापरौतें । मिरवणें नाहीं कापुरातें । तेवीं बहुतांपरी स्फुरतें । तेंचि स्फुरे ॥ ९-१५ ॥

परी तो कापूर 

तयाच्या ठिकाणी 

सुगंधा वाचूनी 

काय असे ॥२५

तयापरी बहु 

दिसे रुप गुणे 

गोष्टी त्या आनाने 

प्रत्ययासी॥२६

परी मूळ असे 

एक आत्मतत्त्व 

स्फुरण  रूपात 

ज्ञानमय ॥२७

🌾🌾🌾 .

डॉ.विक्रांत प्रभाकर तिकोणे

https://amrutaanubhav.blogspot.com

🏵🏵